登入
註冊
6個畢業生搵工常見問題，HR顧問教你點解決
02 - April
- 2024
畢業生搵工難免會有些迷茫，以下是我們收集了一些畢業生搵工常見的疑問，並且針對這些問題整理了一些建議，希望能解答各位畢業生的搵工疑難！
◈◈◈◈◈
⇨ Send好多CV都石沉大海，點做好？
* 解答 *
◈ 你可以向有求職經驗或做HR嘅親朋戚友求助，幫你檢查下求職信或者履歷表有冇問題，例如履歷表密密麻麻 「長氣過啊爸」。
◈ 求職信唔好「搬字過紙」，每個職位對求職者嘅要求都唔同，應準備一份專屬嘅求職信同履歷表。
◈ 檢討自己嘅搵工策略，睇下我哋嘅「求職6步曲」，研究下邊方面出咗問題。
◈◈◈◈◈
⇨ 份份工都話要有經驗，冇經驗真係唔可以申請？
* 解答 *
◈ 如果你有相關嘅兼職或舉辦活動嘅經驗，都可以嘗試申請。但如果廣告寫明「Applicants must have at least XX years relevant experience」，無相關經驗嘅畢業生就可以慳返啖氣啦。
◈ 喺「hello jobs畢業生網上招聘會」搵工就唔會有問題啦！入面嘅工都係歡迎畢業生申請㗎。
◈◈◈◈◈
⇨ HR話「你冇經驗，只可以開到$1x,xxx人工」呢價位唔理想，點答好？
* 解答 *
◈ 你可以詢問HR：「我都明白嘅，如果表現良好，半年後會唔會有機會加到我嘅理想人工。如果唔得嘅話，可以話比我知要幾耐先可以去到我嘅理想人工？或者我要達到咩要求先可以去到我嘅理想人工？」
◈ 考慮工作唔一定淨睇人工同福利，畢業生應該要考慮埋公司畀嘅機會（如在職培訓、晉升機會、技能應用等），畢業生返工頭兩年應該要學習多啲soft-skill，例如點同其它同事、部門及上司溝通，處理關係同團體合作，同埋可以向前輩學習佢哋嘅經驗同技能。
◈◈◈◈◈
⇨ 收到offer但仲想等吓有冇更好嘅，點覆好？
* 解答 *
◈ 你可以禮貌咁回覆對方「多謝你畀機會我，我上次見完工，都好中意呢份工，不過因為我都想長做一份工，所以我想要啲時間考慮下，Ｘ日後回覆你」。謹記考慮時間最長唔好超過一星期。
◈◈◈◈◈
⇨ 試用期想去旅行，可以請假嗎？
* 解答 *
◈ 你可以係收到公司offer嘅時候講：「我真係好中意呢份工，但係我因為某啲原因，XX-XX號都要離開澳門，我可唔可以攞無薪假或者等我解決咗呢件事先返工呢？睇下公司點樣會比較方便，我都願意配合」。
◈ 謹記放假前要完成你嘅職責同有交帶，盡量減少放假帶嚟嘅不便。
◈◈◈◈◈
⇨ 我應該點睇『加班』？
* 解答 *
◈ 首先要了解你嘅行業加班係唔係正常，某啲行業如Event、Finance，某段時間特別忙碌係好正常嘅；
◈ 了解加班嘅原因，係因為工作量太多定係自己能力不足，適時亦可以請教前輩或搵同事幫忙；
◈ 認清自己喺呢個事業階段嘅目標，想增值自己學多啲嘢定係有錢收就算。如果自己真係接受唔到加班，可以考慮自己係唔係真係適合呢份工。
Follow us:
Hello-jobs APP:
